बाल्टिमोरमा रमाइलो जमघट र बनभोज सम्पन्न

बाल्टिमोर,अमेरिका

बालबच्चाको गर्मी छुट्टी अनि आफूहरुको पनि हप्ताभरिको थकानलाई रमाइलोमा भुलाउने रहर । यसै रहर अनि नयाँ,पुराना साथीहरुलाई भेट्ने सामुहिक थलो अर्थात् बनभोजको रमाइलो । यस्तै रमाइलो अवसर बन्यो यहाँ बाल्टिमोर एशोसियसन अफ नेपलिज इन अमेरिका बानाले आइतबार आयोजना गरेको वनभोज कार्यक्रम । बानाले हरेक वर्षयसरी आफ्ना सदस्य र शुभेच्छुकहरुलाई सहभागी गराएर रमाइलो बनभोज गर्दै आईरहेको छ । हरेक वर्षहुने यस्तो वनभोजमा नेपालीहरुको सहभागितामा पनि वृद्धि हुँदै गईरहेको छ । यस वर्षो वनभोजमा करीब तीन सय नेपालीहरुको सहभागिता रहेको थियो । वनभोज आयोजक संस्था बानाका पदाधिकारीहरु सबै उत्साहित देखिन्थे । अध्यक्ष रबिना थापा सहभागीहरुलाई स्वागत गर्न व्यस्त थिईन् भने उपाध्यक्ष राम्रप्रकाश भण्डारी खानपिनको प्रवन्ध गर्दै कार्यकारी सदस्य उपला उपाध्यायलाई साथै लिएर खेलकुदका कार्यक्रमका लागि दौडधुप गरिरहेका देखिन्थे । यस्तै महासचिव गौतम दाहाल सहभागीहरुलाई स्वागत र कार्यक्रम बारे जानकारी दिन कहिले माइकमा बोलिरहेका देखिन्थे त कहिले खानपीनको स्टलतिर केही कमी पो छ कि भन्दै यताउता गर्दै थिए । एकैछिनमा खेल स्थलमा पुग्ने उनी वनभोजकै बीचमा डि.सी. क्षेत्रबाट प्रसारण भईरहेको रेडियो दोभानको कार्यक्रममा वनभोज सम्बन्धि जानकारी दिन प्रत्यक्ष प्रसारण पनि भ्याईरहेका थिए ।
संस्थाका सचिव सञ्जय घिमिरे सहभागीहरुको नाम र विवरण दर्ताका लागि व्यस्त थिए भने कोषाध्यक्ष राजन केसी कुनै सामानको अभाव भयो कि अर्थात् केही गर्न छुटेको पो छ कि भन्दै खटिरहेका थिए । छेवमै रहेको बार्र्बिक्यु चिकन बनाउन सहयोग गरिरहेका बहादुर पुनः सहभागीहरुलाई स्वादिष्ट चिकन खुवाउन त्यो गर्मीको धुपमा पनि कुनै परवाह नगरी जुटिरहेका थिए । यता पदाधिकारीहरु चेतन पौड्याल र श्रीजन ताम्राकार फोटो खिच्न व्यस्त थिए भने कार्यकारी सदस्यहरु अन्सुया वन्त खानपीन र विनोद उप्रेती राफल चिठ्ठा बेच्न सहभागीहरुका माझ पुगिरहेका थिए ।
स्थानीय गनपाउडर स्टेट पार्कमा सम्पन्न वनभोजमा सहभागीहरुबीच पुरुष र महिला भलिबल प्रतियोगिता,बालबच्चाको चकलेट टिप्ने खेल,ठेलो हान्ने खेल र महिला तथा पुरुषहरुको सहभागितामा डोरी तान्ने खेल जस्ता मनोरन्जनात्मक खेल पनि आयोजना गरिएको थियो । यसैगरी राफल चिठ्ठा समेत सञ्चालन गरिएको थियो । सबै प्रतियोगितामा विजयी टीम तथा खेलाडीहरुलाई बानाका अध्यक्ष रबिना थापाले पुरस्कार तथा प्रमाणपत्र प्रदान गर्नुभएको थियो । यसैगरी बानाले आयोजना गरेका कार्यक्रमहरुमा स्वयंसेवकको रुपमा सहयोग गर्नेहरुलाई पनि अध्यक्ष थापाले प्रशंसापत्र वितरण गर्नुभएको थियो । वनभोजमा सहभागी हुनेहरु आफैंले खानाका विभिन्न परिकारहरु बनाएर वनभोजमा लिएर आएका थिए । यसरी सबैले बनाएर ल्याएका खानाका परिकारहरु एकै ठाउँ भेला भएर रमाइलो वातावरणमा खानपीन गर्न पाउँदा सहभागीहरु निकै खुशी देखिएका थिए । नेपाली खानाका विभिन्न परिकार,नेपालीपनको झझल्को यस्तो रमाइलोमा भुलेकाहरु कहिले डिजेडीले प्रस्तुत गरेको गीत संगीतमा मस्त देखिन्थे त कहिले साथीभाईसँगको भेटघाटमा दुःखसुख साटासाट गर्दै गरेका । यस्तै रमाइलोमा सहभागी हुन आइपुगेका थिए सदावहार वरिष्ठ गायक दीप श्रेष्ठ अनि एशोसियसन अफ नेपलिज इन अमेरिका एएनएका नवनिर्वाचित अध्यक्ष,जो बानाका आजीवन सदस्य पनि हुन् सिमोन ढुंगाना । उहाँहरु दुवैलाई खादा पहिर्याएर बाल्टिमोरको नेपाली आँगनमा स्वागत गरेकी थिइन् बाना अध्यक्ष रबिना थापाले । दिनभरिको रमाइलो माहौलको अन्त्यमा खानाका विभिन्न परिकार लिएर वनभोजमा सहभागी सबैलाई धन्यवाद दिंदै अध्यक्ष थापाले बानाका आगामी गतिविधिहरुमा पनि आफ्ना सदस्य र शुभेच्छुकहरुबाट यस्तै सहयोग र सक्रियताको अपेक्षा गरेको भनाई व्यक्त गरेकी थिइन् । सोही अवसरमा अमेरिकाका लागि नेपाली दूतावासका प्रथम सचिव हरिश्चन्द्र घिमिरे, एएनएका अध्यक्ष सिमोन ढुंगाना,एएनएसएका अध्यक्ष विष्णु थापा,म्याग्दी समाजका अध्यक्ष पारसमणी श्रेष्ठ,बानाका पर्ूव अध्यक्ष मोहन थापा सहितले रमाइलो, व्यवस्थित,भव्य र सफल वनभोजको आयोजना गरेको भन्दै बानाका आगामी कार्यहरु अझ प्रभावकारी हुन सकोस् भन्दै शुभेच्छा व्यक्त गर्नुभएको थियो ।