पत्रकारमाथि सांघातिक आक्रमण

रुकुम, २०६६ मंसिर २३ - समाचार लेखेकै कारण दुई सातादेखि धम्कीको सामना गर्दै आएकी रुकुमकी पत्रकार टीका विष्टमाथि मंगलबार सांघातिक आक्रमण भएको छ । आक्रमणकारीले विष्टको दाहिने हातका औंला ब्लेडले चिरिदिएका छन् । घटनास्थलमा भाँचिएको कलम, च्यातिएका कागजपत्र र फुटाइएका ल्यापटप, रेडियो र मोबाइल भेटिएको छ । उनलाई कुटपिट गरेर भीरबाट लडाइएको आशंका छ । टाउकामा चोट लागेकाले विष्टको स्थिति गम्भीर रहेको चिकित्सकले बताए । सात घन्टाभन्दा बढी बेहोस भएकी विष्टको साँझमात्र होस खुलेको छ । 'टाउकामा चोट लागेकाले सिटिस्क्यान नगरी केही भन्न गाह्रो छ,' जिल्ला अस्पतालका डा. अपूर्ण कार्कीले भने । विष्ट स्थानीय सिस्ने एफएमकी समाचार संयोजक हुन् ।'किन ब्लेडले चिर्छस् ? सक्छस् भने खुकुरीले हान्' भन्दै विष्ट बेहोसी अवस्थामै चिच्याएको स्वास्थ्यकर्मीले बताए । दिउँसो पौने १२ बजेतिर सहकर्मी धनवीर दाहाललाई फोन गरेर उनले आफू घेरिएको बताएकी थिइन् । 'आत्तिँदै दुई- तीन जना केटाहरूले लखेटिरहेका छन्, बचाउनुस् भन्दै थिइन् । फोन कट्यो,' दाहालले कान्तिपुरसित भने, 'तत्कालै कल ब्याक गर्दा स्विचअफ भइसकेको थियो ।' विष्ट एफएमबाट काम सकेर सल्लेस्थित अस्पताल जान लाग्दा मठगाउँमाथि आक्रमण भएको हो । उनी भीरबाट २० मिटर तल बेहोस अवस्थामा भेटिएको प्रहरीले जनाएको छ । उनी अझै अर्धअचेत अवस्थामा रहेकाले घटनाबारे बुझ्न कठिनाइ भएको प्रजिअ शम्भु मरासिनीले बताए । थाहा पाउनासाथ प्रहरीले उद्दार गरेर अस्पताल पुर्‍याएको जानकारी दिँदै अनुसन्धान सुरु गरिएको मरासिनीले बताए । एक महिनाअघि सिस्ने एफएम उद्घाटन गर्न मुसिकोट पुगेका सञ्चारमन्त्री शंकर पोखरेललाई कालोझन्डा देखाउँदै विरोध गर्ने क्रममा वाईसीएल कार्यकर्ताले 'तीर्था गौतमको झै धेरैको सिन्दूर पुछ्ने' नाराबाजी गरेका थिए । पत्रकार विष्टले जन्तिधारा साप्ताहिकमा 'किन चाहियो माओवादीलाई तीर्थाको सिन्दूर' शीर्षकमा टिप्पणी प्रकाशन गरेकी थिइन् ।स्राेतअनुसार आक्रोशित माओवादी कार्यकर्ताले परिचय लुकाएर बारम्बार उनलाई धम्क्याउँदै आएका थिए । धम्की दिनेहरूबाटै आक्रमण भएको हुनसक्ने पत्रकार महासंघ रुकुमका सचिव कमल थापाले बताए । कसैले भाउजू बिरामी परेर अस्पताल आएको झूटो खबर गरेपछि विष्ट अस्पतालतिर लागेकी थिइन् । माओवादी जिल्ला इन्चार्ज सरुन बाठाले घटनाबारे आफूले थाह पाए पनि बुझ्न नपाएको बताए । 'मैले पनि सञ्चारमाध्यमबाट थाहा पाएँ,' आक्रमणमा माओावादी संलग्नताको आशंका गरिएकाबारे उनले भने, 'भीरबाट लडेको हो कि कुटपिट गरेर लडाइएको हो, बुझ्न बाँकी छ ।'महासंघद्वारा भत्र्सनाकाठमाडौं- नेपाल पत्रकार महासंघले पत्रकार विष्टमाथि सांघातिक हमलाको भत्र्सना गरेको छ । राजधानी दैनिककी रुकुम संवाददाता तथा महासंघ केन्द्रीय सभासद विष्टलाई मंगलबार मुसिकोटस्थित उनको घरबाट दुई सय मिटर टाढा झाँडीमा अचेत अवस्थामा फेला पारेको थियो । टाउको, हात र खुट्टामा गम्भीर चोट लागेको अवस्थामा फेला परेकी विष्टलाई उपचारका लागि जिल्ला अस्पतालमा भर्ना गरिएको महासंघद्वारा जारी विज्ञप्तिमा उल्लेख छ । तर उपचारमा संलग्न चिकित्सकले थप उपचारका लागि अन्तै लैजानुपर्ने बताएको महासंघले जनाएको छ ।