हङकङमा १५ औं विश्व आदिवासी जनजाति दिवस सम्पन्न

प्रकाश के.सी.
जोर्डनस्थित गर्ल्स गाइड एस्सोसिएसनको हलमा आदिवासी जनजाति महासँघ हङकङले १५ औं विश्व आदिवासी जनजाति दिवस विभिन्न किसिमका जातीय तथा साँस्कृतिक झाँकीलगायत पारम्परिक नृत्यहरुको सामूहिक प्रदर्शन गरेर सम्पन्न गरेको छ । सोही कार्यक्रमको लागि भनी जनजाति महासँघका संस्थापक केन्द्रीय महासचिव, नेकपा एकीकृत माओवादीका पोलिटब्युरो सदस्य तथा सभासद सुरेश आलेमगरको प्रमुख आतिथ्यमा बसेको कार्यक्रमको औपचारिक चरणमा आदिवासी जनजाति महासँघ हङकङका अध्यक्ष भूपेन्द्र चेम्जोङको सभापतित्व रहेको थियो भने, हङकङ महावाणिज्यदूत केशवप्रसाद भट्टराई, हङकङ नेपाली महासँघका अध्यक्ष हेम लिम्बू विशेष अतिथि रहेका थिए । कार्यक्रममा अष्ट्रेलिया, भिक्टोरियाका लागि अनरेरी कन्सल योगेन्द्र योन्जनको पनि उपस्थिति रहेको थियो । महासंघका सचिवबाट सञ्चालित उक्त चरणलाई उपाध्यक्षबाट स्वागत मन्तव्य दिइएको थियो । माओवादी पोलिट ब्युरो सदस्य तथा सभासद र जनजाति संस्थापक केन्द्रीय महासचिव सुरेश आलेमगरलाई जनजाति महासँघ हङकङले फेटा पहिर्‍याई तथा उपहारहरु प्रदान गरी स्वागत तथा सम्मान व्यक्त गरेको थियो ।हरेक वर्ष जस्तै यो साल पनि जनजाति महासँघ हङकङले हङकङका विभिन्न क्षेत्रमा जनजातिका तर्फबाट समाजमा योगदान दिने व्यक्तित्वहरुबाट वर्ष पुरुष तथा वर्ष चेली भन्ने दुई शीर्षकमा व्यक्तिहरुलाई सम्मान गर्ने प्रथालाई कायम गर्दै पत्रकारिताको क्षेत्र र सामाजिक कार्यको क्षेत्रबाट वर्ष पुरुषमा एभरेष्ट साप्ताहिकका सम्पादक किसन राई र वर्ष चेलीमा तमु ट्हो हङकङका अध्यक्ष ईच्छा कुमारी गुरुङलाई फेटा, खादालगायत प्रशंसापत्रहरु प्रमुख अतिथि आलेमगरबाट प्रदान गरेको छ । सम्मानित भएपश्चात् वर्ष पुरुष किसन र्राई तथा वर्ष चेली ईच्छा कुमारी गुरुङले भविष्यमा समाजका लागि अझै राम्रो गर्दै जाने वचनवद्धता दर्शाएका थिए ।कार्यक्रमको औपचारिक चरणमा अतिथिहरुमा भक्तबहादुर दुरा, योगेन्द्र योन्जन, केशवप्रसाद भट्टराईले आआफ्ना मन्तव्य शुभकामनाका रुपमा राखेका थिए । प्रमुख अतिथि सभासद सुरेश आलेमगरले आदिवासी जनजातिबारेमा विस्तृत रुपमा मन्तव्यको क्रममा चर्चा गरेका थिए । आफूलाई कट्टर जातिवादीको रुपमा नेपालमा चित्रण गरिएको र आफ्नो वाहुनवादविरुद्ध विचारहरुले गर्दा मिडियाहरुले एक किसिमले वहिस्कार गरेको भन्ने आलेमगरले जातीय आधारमा संघीयतामा जानु नै नेपालको परिवेशमा उत्तम रहेको बताएका थिए । यही जातीयताको आधारमा संघीयतामा जाने सवालमा प्रदेशबीचमा भइरहेको सीमाविवादको कुरालाई पनि चर्चामा ल्याउने आलेमगरले जातीय आधारमा नामाङ्कन गरिने प्रदेशहरुमा सो जातीयताको जनसङ्ख्या उच्च बनाइने जानकारी दिएका थिए । नेपालमा कतिपय जातीय आधारमा छुट्याइएका प्रदेशहरुमा सो जातिहरु नै अल्पमतमा रहेको यथार्थहरुको चर्चा नेपालमा भइरहेको भन्ने सन्दर्भमा सो जानकारी दिने सभासद आलेमगरले नेपालमा जातीय आधारमा सघीयतामा जानकालागि विविध जातजातिहरुको स्थानान्तरण गरिने सम्भावना दर्शाएका थिए । अन्त्यमा कार्यक्रमका सभापति तथा आदिवासी जनजाति महासँघ हङकङका अध्यक्ष भूपेन्द्र चेम्जोङले आफ्नो मन्तव्य राखी कार्यक्रमको उक्त औपचारिक चरणको विसर्जन गरेका थिए ।मनोरञ्जनको कार्यक्रममा राई, लिम्बू, नेवार, गुरुङ, मगरहरुबाट आआफ्नो संस्कृति झल्किने किसिमको पारम्परिक जातीय नृत्यहरुको प्रस्तुति गरिएको थियो । सँधैकै जस्तै यो साल पनि कार्यक्रम स्थलमा विभिन्न जातीय साँस्कृतिकता झल्काउने किसिमका कालान्तरदेखि नियमित प्रचलनमा आउँदै गरेका भाँडाकुँडालगायत वाद्यवादनका यन्त्र तथा सरसामानहरुको प्रदर्शनीमा राखिएको थियो ।